LAOAG CITY – Naipangaton iti Code White alert ti Pangasinan kabayatan nga agtalinaed ti panaglayus ti sumagmamano a lugar ken agsagsagana dagiti otoridad iti posible a panagpigsa ti habagat iti sumarsaruno nga aldaw.
Agtultuloy ti panaglayus kadagiti sumagmamano a barangay iti Lingayen, Binmaley, Dagupan City ken Calasiao nupay in-inot a bumabbaba ti danum iti dadduma a lugar.
Segun ken ni Pangasinan Disaster Risk Reduction and Management Office emergency operations center supervisor Pia Navata-Flores manarimaan ti heightened monitoring-da, aglalo iti operations center.
Inbatadna nga agtultuloy iti monitoring-da iti development ti nagduduma a weather system a makaapektar iti probinsia.
Indeklerar ti state of calamity iti Dagupan City, Mangaldan, Sta. Barbara, Bugallon ken Mangatarem.
Iti Calasiao, agtalinaed nga above critical level ti Marusay River ken malaylayus latta dagiti barangay Talibaew, Longos, Lumbang, Lasip, ken Mancup kabayatan a bumabbaban ti danum iti 16 a barangay.
Agtalinaed iti evacuation centers ti 42 a pamilia wenno 156 nga indibidual iti Calasiao.
Basar iti Philippine Atmospheric, Geophysical and Astronomical Services Administration (PAGASA) rainfall advisory itay alas-8 ti bigat ti Martes, Agosto 25, manamnama ti nakapuy agingga ti kalalainganna ken ti sagpaminsan a napigsa a panagtudo iti dakkel a paset ti Pangasinan gapu iti Habagat.
Binalakadan dagiti residente a bantayan dagito opisial nga anunsio ken sumurot no ipatungpal ti lokal a gobierno ti preemptive evacuation.
