Indeklarar ti Department of Health (DOH) idi Oktubre 27 ti maysa a Code White Alert para kadagiti Health Emergency Response Teams (HERTs) ken ospital iti Metro Manila inton Undas, manipud Oktubre 31 agingga Nobiembre 2.
Segun iti DOH-Metro Manila Center for Health Development, ti Code White Alert ket maysa a precautionary measure iti manamnama a posible a panagngato ti pasiente nga agkasapulan ti insigida nga atension inton Undas.
Iti babaen ti Code White Alert, maikabil dagiti health facilities ken healthcare workers iti heightened readiness tapno masigurado ti prompt response iti emergencies ken dagiti dadduma nga insidente a mabalin a mapasamak iti panagselebrar ti Undas.
Kabayatanna, binalakadan ti DOH-Metro Manila Center for Health Development ti publiko a iprioridad ti salun-at ken kinatalgedda kabayatan ti panagbiahe ken panagbisita kadagiti kampusanto kas ti umno a panag-ugas ti ima wenno panagsar ti alcohol-based hand sanitizers, panagtakkub ti ngiwat ken agon no aguyek ken agbaeng tapno malappedan ti panagwaras ti sakit , panagitugot ti danum tapno maprebentaran ti dehydration, ken panagitugot ti agas.
