Inbatad ni Mrs. Carolyn Batangan, agpapaay iti maysa a flower shop ditoy ciudad ti Laoag a kadagitoy a gundaway ket bassit paylaeng dagiti napan nagorder kadakuada ti sabsabong para iti Undas 2026.
Segun kenkuana, silulukat da para kadagiti mayat nga agorder, iti man online wenno walk-in, no sadinno a namnamaen da a ti panagado dagiti mapan agorder ket intono Oktubre 30 agingga iti 31.
Kuna na pay nga agpapan ita ket awan ti panaggaraw ti presyo dagiti lakoda a sabsabong.
Inrakurak na a ti sabong a rados a kangrunaan a mailaklako para iti minatay ket agbalor ti 40 a pisos iti kada pedaso, idinto a dagiti dadduma ket nangin-ngina laeng agdepende iti klase ti gatangen.
Innayon na a dagiti ar-aramiden da a naka-basket a sabong para iti Undas ket magatang ti kababaan a presyo iti P150 a pisos idinto a dagiti addaan ti stand ket kababaan ti P1500 a pisos.
Mainaig iti daytoy, inpasigurado ni Batangan nga awan ti panagkurang ti supply dagiti produkto da gapu ta inaldaw da nga agpasangpet kadagiti order da a sabsabong.
