Inbatad ni Police major Jephre Taccad, ti Provincial Public Safety, Peace and Order Officer iti Ilocos Norte Police Provincial Office a malaksid kadagiti uniformed personnel ken force multiplier a maiwaras kadagiti kamposanto, ket addan to pay dagiti nakasibilyan a kadwa da nga agmonitor kadagiti nasao a lugar.
Inlawlawag na a dagiti nakasibilyan a kakadwa da ket nawaywaya danto nga agsursur ken agmonitor kadagiti kamposanto, aglalo kadagiti mapagdudwaan ti aktibidad na.
Kuna na a babaen iti daytoy ket masigurado ti natalged ken naurnus a pannakaobserbar ti undas wenno ti panagbisita kadagiti pimmusayen nga ipatpateg iti biag.
Kabayatanna, nagpalagip ni Taccad iti publiko a saan pay a nakadalos iti tanem dagiti kabagyan da a saanda koman nga urayen ti Nobyembre 1 ken 2, a panagdalos da.
Nagballaag a no adda dagiti agitugot paylaeng ti pintas wenno dadduma pay a pagdalos intono Undas ket kumpiskaren da dagitoy gapu ta saan a maipalubos a maiserrek iti kamposanto.
Kabayatanna, inulit manen ni Taccad ti nagpalagip met kadagiti umili a saan nga agitugot iti arak ken dagiti banag a makadangran iti pada a tao iti panagturong iti kamposanto.
Innayon na a masapol nga ammo a respetaren iti tunggal maysa tapno maliklikan nga adda ti maparnuay a panagririri kadagiti kamposanto.
