LAOAG CITY – Inlawlawag ni Police Colonel Allen Rae Co, hepe ti Public Information Office ti Philippine National Police (PNP) a nabayagen ti agwar-waras iti online a ladawan ni Sen. Ronald ‘Bato” dela Rosa iti maysa a sementeryo.
Ti nasao a panangilawlawag ti Philippine National Police ket kalpasan ti nagwaras a ladawan iti social media idi laeng kallabes a nangitunda ti ekspekulasion a nagpakita ti senador iti Digos City, Davao del Sur, iti baet ti agtultuloy a panagbirok dagiti otoridad kenkuana.
Maipalagip a manarimaan a birbiroken dagiti otoridad ni Dela Rosa mainaig pay laeng iti arrest warrant nga inparuk-at ti International Criminal Court (ICC) kontra kenkuana gapu iti reklamo a maipagarup a crimes against humanity nga adda pakainaiganna iti war on drugs ti naglabas nga administrasion.
Malaksid iti daytoy, inbatad pay ti Department of the Interior and Local Government (DILG) ti panangipaayna ti P50 million a gunguna iti siassinnoman ti makaited ti impormasion a mabalin nga aramaten dagiti otoridad tapno maamoan ti paglemlemmengan ti senador.
