Inpasingked ti Bureau of Fire Protection ditoy ciudad ti Laoag nga adda dagiti nakasagana a mabalin da a pagalaan iti danom a mausar no adda ti respondean da nga uram iti baet ti mapaspasaran nga epekto ti El Niño.
Segun ken ni Fire Inspector Edison Reyes, ti Fire Marshall iti Bureau of Fire Protection ditoy ciudad ti Laoag, mangisaysayangkat da ti imbentaryo iti mabalin da a pagalaan ti danom no kasapulan kas iti bubon iti asideg ti fire station, malaksid pay kadagiti fire hydrants iti nagduduma a paset ti ciudad.
Nupay kasta, kuna na a dagiti danom kadagiti hydrants ket saan a mabalin nga urnungen da iti tangke iti truck da gapu ta adda ti laok na a chlorine.
Innayon na a no mabayag ti danom nga adda ti chlorine na iti tangke ti truck da ket madadael daytoy.
Mainaig iti daytoy, kuna na a no dagiti met nagduduma a barangay ket ado met dagiti mabalin da a pagalaan ti danom kas kadagiti irigasyon.
Inpakaammo pay ni Fire Inspector Reyes nga adda dagiti fire brigades ken Community Fire Auxiliary Group a dimmalan iti training, tapno adda ti katulungan da nga agresponde kadagiti nagduduma a barangay.
