Inbatad ti Department of Agriculture (DA) a possible nga umaboten iti P20 bilyon ti perdisyon nga intunda ti El Niño iti sektor ti agrikultura ken makaapektar ti sumuruk-kumurang a 350,000 nga ektarya a pagtatalunan.
Iti budget hearing ti Senado, inbatad ni Agriculture Secretary Francisco Tiu Laurel Jr. nga agsagsaganan ti ahensya iti possible a nakarkaro nga epekto ti El Niño, partikular kadagiti mannalon ken mangngalap.
Basar iti Department of Agriculture, ti worst-case scenario ti ahensya ket minilyon a mannalon ken fisherfolk ti mabalin a maapektaran idinto nga agtultuloy ti nangato a temperatura ken kinakurang ti tudo.
Inyarig ni Tiu Laurel ti sitwasyon iti El Niño idi 2023 agingga ti 2024 a nangitunda ti sumuruk-kumurang a P16 bilyon a perdisyon iti agrikultura.
Mapatta-patta a mabalin a bumaba iti 700,000 agingga iti maysa a milyon a metriko tonelada ti produksyon ti bagas gapu iti El Niño.
Segun ken ni Laurel, kasapulan ti pagilian ti nayun a supply ti bagas tapno masigurado nga umdas ti supply ken buffer stock kabayatan ti panagtultuloy ti dry spell.
Iti kaudian a datos ti Department of Agriculture, umaboten iti P8.57 bilyon ti nairekord nga agricultural damage ken losses gapu iti El Niño, no sadinno a ti dakkel a paset na keet manipod iti mais ken pagay.
Kas panagsagsagana, inbatad ni Tiu Laurel a paiyal-alisto ti Department of Agriculture ti pannakaipatungpal ti solar-powered irrigation projects ken agkidkiddaw ti nayun a pondo para iti solar pumps, water impounding facilities ken dadduma pay a pang-imprastraktura tapno mapagtalinaed ti suplay ti danom.
Karaman kadagiti addang ket ti panagibunong ti bin-I ken dadduma pay a production support ken ti pannakikoordinar iti dadduma pay nga ahesnsya para iti cash assistance ken emergency employment dagiti maapektaran a mannalon ken mangngalap.
Immunan a nangipila ti Department of Agriculture ti P61.99-bilyong El Niño action plan tapno maprotehiran ti food production ken pagbiagan iti rural area.
