LAOAG CITY -Binalakadan ni Engr. Shiela Opelac, ti mangidadaulo ti City Agriculture Office ditoy siudad ti Laoag dagiti mangngalap nga isapsapa da nga apiten len ilako dagiti taraken da a lames wenno ikan kas panagsagana iti agbalin nga epekto ti Super El Niño.
Inbatad na a babaen iti daytoy ket maliklikan ti nakaro nga agbalin nga epekto ti Super El Niño kadagiti taraken a lames wenno ikan dagiti mangngalap.
Kunana pay a babaen iti daytoy ket maliklikan ti ‘fish kill’ gapu ta no nabara ti panawen ket alisto a matay dagiti ikan no sadinno a no mapasamak daytoy ket dakkel ti agbalin a pukaw dagiti mangngalap.
Mainaig iti daytoy, kunana nga iti agdama ket awan met pay ti nairekord da a nadadael a produkto ti agrikultura kas epekto ti El Niño.
Nupay kasta, agtultuloy ti panang-monitor da kadagiti amin a barangay ditoy siudad tapno maipaayan ti solusion no adda man ti agbalin nga epekto ti El Niño.
Immunan a nangipaay ti fishery inputs ti City Agriculture Office ditoy siudad ken kiniddaw da kadagiti benepisiario a saan nga ilako dagitoy, kalpasan dagiti sayangguseng a maipagarop nga adda dagiti barangay a mangilaklako kadagiti naawatda nga agri ken fishery inputs.
