Inbatad ni Engr. Ma Teresa Bacnat, ti mangidadaulo ti Provincial Agriculture Office a saanen nga ipilit dagiti mannalon ti agmula ti pagay no awan ti pangalaan da ti umdas a supply ti danom nga usaren da iti panagtalon.
Inbalakad na nga imbes a pagay ket agmula laengen dagiti maseknan a mannalon ti nagduduma ti klase na a nateng a dagitoy ket saan nga agkasapulan ti nabuslon a danom.
Inlawlawag na a no nateng ti imula dagiti mannalon ket al-alisto da laeng nga apiten ken saan a kasapulan ti ado a danom.
Kuna na a no adda dagiti mannalon a mapan iti opisina da tapno agkiddaw ti tulong ket iraprapin da ti mangipaay ti balakad no ania dagiti kasayaatan nga imula da tapno saan a madadael ken masayang ti bannogda.
Innayon na a nupay adda ti nakasagana nga interbesyon ti gobierno probinsyal mainaig iti possible nga epekto ti nakaro nga El Niño, kasapulan latta a maadalan dagiti mannalon ken adda ti naan-anay a kooperasyon iti nagbaetan da ti Provincial Agriculture Office.
