LAOAG CITY – Inpetteng ni Asia’s Multimedia Star Alden Richards ti importansia ti panagaramid ti nasayaat iti sabali a tao ken ti panangipaay ti tulong iti sabali nga awan ti ur-urayenna a kasukat.
Daytoy ket rakurak ni Alden kabayatan ti panagsaritana iti Hero For All 2026 idi Oktubre 25 kadaytoy a tawen.
Napadayawan iti nasao nga event ti 20 nga unsung Filipino heroes wenno dagiti ordinario a Pilipino a nakaaramid ti nasayaat ken nangipakita ti naidum-duma a panagayat kadagiti bukodda a lugar.
Iti panagsarita ni Alden, kinunana a napateg a pagtalinaeden ti kinasayaat uray man pay adda dagiti gundaway a narigat nga aramiden daytoy.
Kabayatanna, nakaala ti atension ti nagbalin a rakurak ni Alden gapu iti manarimaan nga alegasion ni social media personality a ni Xian Gaza kenkuana.
Karaman kadagiti alegasion ti content creator ket ti maipanggep iti maysa a condominium unit ken ti innem nga agkakangina a relo a maipagarup a bulbuluden laeng ni Alden.
Nupay kasta, saan a masigurado dagiti tao no ti dinakamat ni Alden a nasayaat daytoy a tao ket direkta a sungbatna iti nasao a kontrobersiya.
