LAOAG CITY – Naaprubaranen iti maikatlo ken pinal a panagbasa ti Kamara iti gakat nga ideklerar ti Setiembre iti kada tawen kas National Bullying Awareness and Prevention Month iti tengnga ti panawagan ni House Speaker Faustino “Bojie” Dy III a siguradoen dagiti pagadalan ken komunidad para kadagiti agtutubo.
Ti House Bill No. 10134 wenno ti gakat a “National Bullying Awareness and Prevention Month Act” ket nakagun-od ti 245 a botos ti immanamong iti gakat, awan ti saan nga immanamong ken awan nag-abstain.
Basar ken ni Dy, gagemna daytoy a patibkeren ti awareness ti publiko kontra iti bullying ken pagkaysaen dagiti pagadalan, pamilia, komunidad ken ahensia ti gobierno tapno malappedan dagiti aramid a mangitunda ti nakaro a risgo kadagiti ubbing.
Iti babaen ti gakat, ipatungpal dagiti aktibidad a mangipangato ti awareness iti pangprotehir kadagiti agtutubo kontra iti panang-abuso, kinaranggas ken exploitation iti bulan ti Setiembre.
Nadutokan iti Department of Education (DepEd) iti pakibinnulig iti National Youth Commission (NYC) ken Council for the Welfare of Children (CWC) nga agsagana iti tinawen a programa para iti panangselebrar iti daytoy iti amin a public ken private elementary ken highschool iti intero a pagilian.
Malaksid kadagitoy, makitinnulong pay ti Philippine Information Agency (PIA) tapno masigurado ti nalawa a panangipatungpal ti impormasion mainaig iti linteg kabayatan nga inallukoy dagiti lokal a gobierno ken pribado a sektor a makipaset kas paset ti komprehensibo a pagsungbat iti problema.
Inpettenng ni Dy a nagbaliw ti bullying gapu iti teknolohia no sadinno saan laeng a mapasaran iti uneg ti pagadalan no di ket iti social media ken digital platforms.
