LAOAG CITY – Makatipid ti P30 billion ti gobierno iti temporario a pannakaitantan ti Barangay ken Sanguniang Kabataan Elections (BSKE).
Daytoy ti inbatad ni House Deputy Speaker Janette Garin, segun kenkuana, saan laeng a makatipid ti gobierno iti pannakaipaatiddog ti termino dagiti lokal nga opisial no diketdi mangted pay daytoy ti naan-anay a panawen iti Kongreso tapno papintasen ti possible a reporma iti BSKE.
Iti agdama, segun ken ni Garin, naaprubaranen ti rakurak a pannakaitantan ti Barangay ken Sanguniang Kabataan Elections (BSKE) iti dua a sangay ti Kongreso.
Nupay kasta, inadmitir ti Kongresista ti panagdu-dua ti publiko iti pannakaipaatidog ti termino dagiti lokal nga opisial gapu ta adu dagiti botante ti nadismaya iti performance dagiti sumagmamano nga opisial ti barangayda.
Mainaig iti daytoy, inpettengna a saan amin nga opisial ti barangay ket awan ti serserbina, ken adda dagiti opisial a napintas ti intensionna ngem gapu iti kinakurang ti panawenda iti termino, saanda a maaramid dagiti amin a kalikagumda para iti Barangay.
