Kalikagom ti Sanguniang Panlungsod iti ciudad ti Batac a masolusyunan ti problema mainaig ti nababa a presyo ti liveweight.
Daytoy ket kalpasan nga indasar ni Hon. Violy Daradar Nalupta ti obserbasyon ti kaadwan nga umad-ado dagiti residente iti siudad ti agal-ala ti lako da a baboy iti ili ti Paoay gapu ta nalaklaka ken ado pay dagiti kaykayatna ti mapan makitienda iti nasao nga ili.
Inpetteng ti Chairman ti Committee on Market and Slaughter House a saan a malapdan dagiti consumer a mapan gumatang iti sabali nga ili isut gapuna a masapol a masolusyunan ti nasao a problema.
Ti kidkiddawen dagiti agtartaraken ti baboy iti ciudad ket 200 a pisos iti kada kilo ti liveweight, ngem gapu ta ditoy ciudad ti Laoag ket 140 iti kada kilo idinto a dagiti dadduma nga ili 180 iti kada kilo, kapilitan a naipababa met iti ciudad ti Batac.
Kabayatanna, inpakaammo met ni Hon. Gilbert Medina, Liga ng mga Barangay President iti ciudad ti Batac, nga iti naisayangkat a taripnong kadagiti sumagmamano a barangay ket naduktalan da nga adda ti oversupply iti baboy.
Gapu iti daytoy, kalikagom da nga adda ti maisayangkat nga imbentaryo ngem agpapan ita ket saan pay a nalpas, isut gapuna a naikkan da ti pawayway agingga intono Lunes, Nobyembre 16.
