LAOAG CITY – Maluksaw ni Mr. Danver Dela Cruz, agtartaraken ti baboy iti ili ti Dingras gapu ta iti baet ti nangina a presyo dagiti kanen ti tarakenda a baboy ket nababa latta ti presio ti liveweight.
Segun kekuana, ti liveweight ket agbalor laeng iti P140 iti kada kilo Ken adda pay panagbaliw na no sadinno a masansan nga imbes a ngumato ket bumaba pay ti presio.
Malaksid kadaytoy, inbatadna a dagiti biahero nga aggatgatang ti baboy ket P150 laeng ti liveweight da isut gapuna a maluksaw ni Dela Cruz gaputa awan met ti mabalinanna agasipud ta awan met mapastrek da no saanna nga ipagulpi nga ilako dagiti tarakenna kadagiti biahero a nababa ti liveweightna.
Segun kenkuana, narigat no saggaysa ti panaglakona gaputa sumubra met ti aldaw dagiti dadduma a tarakenna.
Kinunana a masansan a dagiti umay aggatgatang kadagiti tarakenna ket aggapu iti kabangibang a probinsia ngem saanna daytoy a kanayon a laklakoan gaputa no ibilang ket ad-adu met ti gastosnan ti panagtaraken no ikumparar iti mapastrekanna.
Inbatadna a ti pagpuunan ti panagtaraken ket masapolna ti uppat a sako ti feeds no sadinno, umabot iti P11,500 no mairaman ti baboy a padakkelen a gatangen.
Gapu iti daytoy, kiniddaw ni Mr. Dela Cruz a sakbay a rumuar dagiti magatang a baboy ket masapol a kitaen dagiti kameng ti Barangay ken kasta met iti pagserrekan ken pagruaran ti probinsia no nasurot met laeng ti umno a naimplementar a presio a nakailanad iti paglintegan.
Innayonna pay a kas iti NFA, masapol a ti gobierno ti manggatang kadagiti baboy tapno saan laeng a dagiti partidor ti bumakbakanang.
