Nasapgud ti maysa a delivery truck ti nakabisekleta iti paset ti by-pass road iti Barangay Guerrero iti ili ti Dingras.
Basar iti Ilocos Norte Police Provincial Office, agpada nga agpapalaud ti delivery truck ken bisikleta idi napasamak ti insidente.
Nabigbig ti nakabisikleta a maysa a menor de edad, estudyante ken residente iti Barangay Madamba iti ili ti Dingras idinto a ti nangiturong ti delivery truck ket nabigbig met iti nagan na laeng a “Rowell”, agtawen ti 39 ken taga Sto. Domingo, Ilocos Sur.
Iti imbestigasyon, kabayatan iti panag-overtake ti delivery truck ket ditoy metten a nasapgud na ti nakabisikleta.
Gapu iti napasamak, nagsagaba ti nakana a sugat ti menor de edad no sadinno nga immuna a naitaray iti Dingras District Hospital ngem naiyakar iti Mariano Marcos Memorial Hospital and Medical Center iti ciudad ti Batac para iti naan-anay a pannakataming na.
Agpapan maisursurat daytoy a damag ket saan pay a masinunuo no addan ti panagsarita ti driver ti delivery truck ken ti pamilya ti menor de edad mainaig iti napasamak.
