Nabirukan ti bangkay ti dua a lalaki a pakairamanan ti maysa a menor de edad iti waig iti igid ti national highway asideg ti Brgy. Lang-Ayan iti ili ti Currimao.
Basar iti Philippine National Police iti ili ti Currimao, apaman a naawat da ti report mainaig iti insidente ket insigida da a nagresponde iti lugar.
Nabigbig dagiti biktima nga isuda Dave Christian Ragus y De Guzman, agtawen ti 23, awanan ti asawan, construction worker, ken ti kadwa na a menor de edad, agpada dagitoy a residente iti Brgy. Dalayap iti ili ti Pinili.
Nakita pay iti lugar ti maysa a motorsiklo nga agmaris ti nalabbaga a nagluganan dagiti biktima.
Iti inisyal nga imbestigasyon, kabayatan ti panpannagna ti maysa a residente iti lugar ket adda ti nakita na a tsinelas iti kalsada, ken idi napanna tinan-awan iti waig ket nakita na dagiti biktima a nakadasay iti abay ti motorsiklo, rason nga inreport na a dagus daytoy iti Philippine National Police.
Patien dagiti otoridad a ti driver ti motorsiklo ket napukawan ti kontrol manibela a nangitunda ti pannakaidungpar da iti concrete railings ken nagderetso da iti waig.
Kinumpirmaran met ti pamilya dagiti biktima a dagitoy ket agpada nga adda iti impluwensya ti nasanger sakbay a pimmanaw da iti pagtaengan da iti oras ti alas-diyes ti rabii idi Oktubre 31.
Immuna iti daytoy, iti panangeksamen ni Dr. Addielou Fidelfio Abad, Municipal Health Officer iti ili ti Currimao kadagiti biktima ket agpada nga indeklarar na dagitoy a dead on the spot.
