Nagtalinaed iti Mariano Marcos Memorial Hospital and Medical Center dagiti lima nga indibidual a nakalugan iti maysa nga Isuzu Altera kalpasan a nakadinnungpar da ti Trailer truck a nagkarga kadagiti mailako a motorsiklo iti paset ti Barangay Maglaoi iti ili ti Currimao.
Daytoy ti inbatad ni Police Capt. John Marc Vergara, ti chief of police iti ili ti Currimao.
Binigbig na ti nangiturong ti trailer truck a ni Loreta Pasion Balota Jr., agtawen ti 43, naasawaan, ken residente ti Sta. Cruz, Laguna idinto a ti driver ti Isuzu Altera ket ni Philip Vira Agsaloy y Vira, awanan asawa, salesman, ken residente ti Lapaz, Abra.
Segun ken ni Vergara, iti inisyal nga imbestigasyon da, agpapa-amianan ti trailer truck idinto nga agpapa-abagatan ti Isuzu Altera idi napasamak ti insidente.
Rumrumuar a na-overshoot ti Isuzu Altera ken napukawan ti kontrol iti manibela ti drayber a nangitunda ti panagdinnungpar da iti trailer truck.
Gapu iti daytoy, nagsagana amin ti sugat dagiti nakalugan ti Isuzu Altera a pakairamanan ti driver rason a naitaray da iti ospital para iti naan-anay a pannakataming da.
Mainaig iti daytoy, inpakaammo ni Vergara nga addan ti pannakisarita da iti dua a driver ken nakasagana da nga aginnaregalo lattan kalpasan ti napasamak.
Nupay kasta, iti biang ti Philippine National Police iti ili ti Currimao ket masapol a patawan da latta ti maiyannatop a pannusa ti driver ti Isuzu Altera kalpasan a naduktalan nga adda ti impluwensya ti nasanger ken awan pay ti lisensya na nga agmaneho.
Kabayatanna, nagpalagip manen ni Police Capt. Vergara kadagiti motorista a saan nga ipilit ti agmaneho no nakainom ti nasanger tapno maliklikan ti aniaman nga insidente.
