Nadangran ti tallo nga indibidual kalpasan a nagdinnungpar ti dua a motorsiklo iti paset ti National Highway iti Brgy. Baduang iti ili ti Pagudpud idi Nobiembre 13 iti oras ti alas-6:40 ti bigat.
Binigbig ti Pagudpud Municipal Police Station ti driver iti maysa a Honda XRM 125 a ni Freddie Rick Agcaoili, agtawen 34, maysa nga electrician, ken residente iti Brgy. Tabbugan, Claveria, Cagayan ngem agdama nga agnanaed iti Novalichez, Quezon City.
Kabayatan a nabigbig met ti driver ti maysa a Honda wave 125 a ni Danilo Jose Lagoc, agtawen 67, maysa a mannalon ken ti kalubbon na iti motorsiklo a ni Rudy M. Calvan, agtawen 78 ken agpada a residente ti Poblacion 2, Pagudpud.
Basar iti inisial nga imbestigasion ti Pagudpud Municipal Police Station, agpada nga turturongen dagiti dua motorsiklo iti amianan a direksion ket sarsarunwen ti Honda XRM 125 ti likudan ti Honda Wave 125 idinto kellaat a naidungpar daytoy.
Kas resulta, agpapada a nagsagaba ti sugat dagiti lugan dagiti motorsiklo. Idinto a naitaray iti kaasitgan nga ospital dagiti maseknan para iti naan-anay a pannakatamingda.
Kabayatanna, basar ken ni P/Maj Lester Dabbay, hepe iti Pagudpud Municipal Police Station, a nagsaritan dagiti maseknan kadaytoy nga insidente ken desidido dagiti nagkalubbon iti Honda wave 125 a kasoan ti driver iti Honda XRM 125.
Innayon ni Dabbay nga awan ti impluwensia ti sanger dagiti driver ti dua a motorsiklo ket nakasuot da ti helmet.
