Ginutigot ni Philippine Red Cross (PRC) Chairman Richard Gordon ti publiko a makipaset iti tinawen a bloodletting project a “Dugong Bombo 2026” ti Bombo Radyo Philippine ken Star FM ti nasurok dua a dekada a pannakaisayangkat iti pagilian.
Segun ken ni Gordon, agserserbi a natibker a kabinnulig ti Red Cross ti nadakamat a programa iti panangsigurado ti umdas a suplay ti dara, kangrunaan kadagiti panawen a makapaspasar ti nakaro a kinarurang ti dara dagiti blood bank.
Inpaganetget pay ti opisial a dakkel a tulong ti napalawa a sakup ti aktibidad ti aggegeddan a maiyuswat iti 25 a kangrunaan a lugar iti intero a pagilian iti panangidaulo ti 32 a venue ti Bombo Radyo ken Star FM.
Mainaig iti daytoy, binigbig ni Gordon dagiti blood donor nga ibilangna kas “Bayani ng makabagong panahon” wenno bannuar iti kabaroan a panawen gapu iti agtultuloy a panangikaysa da kadagiti naisangsangayan a proyekto a mangsalsalaknib ti biag.
Kabayatanna, inpaganetgetna a ti tunggal tedted ti dara a maipaay ket mabalin a mangpaatiddog iti biag ti siasinnoman nga anak, pagayam wenno dagiti saan nga am-amo iti oras ti emerhensia ken nakaro a sakit.
