Sisasagana a makipagkappia dagiti maseknan ti maysa a vehicular traffic incident iti ili ti Currimao a pakairamanan ti maysa trailer truck ken maysa a van.
Daytoy ti inbatad ni PCpt. John Marc V. Vergara, hepe ti Currimao Municipal Police Station.
Basar kenkuana, nakasaritadan ti nagsina a gundaway ti pamilia dagiti nakalugan ti van ken ti agtagikua ti trailer truck ket ditoy a naamoan a silulukatda a makipagkappia ti maysa ken maysa.
Numan agkinnappia dagiti maseknan ti aksidente, inbatad ni Vergara a padatawanda latta ti sanction ti driver ti van gapu ta daytoy ket addaan ti inpluensia ti nasanger ken awan ti lisensiana.
Malagip a napasamak ti nadakamat nga insidente iti paset ti Brgy. Maglaoi Sur iti ili ti Currimao pakairamanan ti maysa a JAC double decker a minaneho ni Loreta Pasion balota jr., agtawen 43, naasawaan ken residente ti Sta. Cruz, Laguna.
Nabigbig met ti driver ti van a ni Mr. Philip Vira Agsaloy, awanan asawa, maysa a salesman ken residente ti Lapaz, Abra.
Basar ti imbestigasion, agturong ti trailer truck ti nga agpaamianan iti dalan kabayatan a ti van ket agturong iti abagatan. Idinto a kellaat a nag-overshoot ti van ti bangir a linia ken nadungparna ti trailer truck.
Gapu iti daytoy, nagsagaba ti sumagmamano a sugat iti bagi ti driver ti van ken dagiti uppat a luganna ken naitaray iti Mariano Marcos Memorial Hospital & Medical Center para iti pannakaamingda.
Kabayatanna, binalakadan ni PCapt. Vergara dagiti agmanmaneho a liklikan ti mangiturong ti maysa a lugan no adda impluensia ti nasanger tapno maiyadayo iti disgrasia.
