Naiget ti panagsagsagana ti Philippine National Police iti ili ti Currimao para iti Undas 2026.
Segun ken ni Police Capt. Marc Vergara, ti chief of police iti ili ti Currimao, addan dagiti lugar a naestablisar da a pakaiwarasan dagiti kameng ti pulisya tapno maipasigurado ti kinatalged dagiti umili aglalo kadagiti agturong kadagiti kamposanto.
Kuna na nga iti Nobyembre 1 ken 2 ket addan to ti dua a pulis nga agbantay iti uneg a mismo ti kamposanto idinto a dua met iti ruwar.
Innayon na nga addan to pay ti maideploy iti simbaan, kasta pay dagiti resorts, ken dadduma a pasdek a kangrunaan a pagturturungan dagiti tattao.
Mainaig iti daytoy, kuna ni Vergara a katulungan da pay dgiti kameng ti Philippine Army, Coastguard, maritime ken ti Bureau of Fire Protection.
Nagballaag met ti opisyal kadagiti agturong iti kamposanto a saanda nga agitugot kadagiti natatadem a banag, kasta pay ti paltog ken arak tapno awan ti maparnuay a riribok.
