LAOAG CITY – Inbatad ni PCapt. John Mark V. Vergara, ti chief of police iti ili ti Currimao, a manarimaan pay laeng ti panang-review-da kadagiti Closed-circuit television (CCTV) footage ti naggapuan ken nagturungan dagiti holdaper iti maysa a gasolinaan iti ili ti Currimao.
Napasamak ti insidente ti maysa a gasolinaan iti Brgy. Maglawi Sur iti nadakamat nga ili iti parbangon ti Oktubre 17 no sadinno a riding in tandem ti primary suspek.
Basar iti footage, nakita nga immuna a nagpagasolina dagiti suspek sakbay ti pannakaisayangkatda ti planoda a panagholdap.
Segun ken ni Police Capt. Vergara, marigatanda a mangbigbig ti kinasiasinno dagiti suspek gapu ta nakasuot dagitoy iti helmet.
Kabayatanna, saanda pay maipasigurado no adda iti armas dagiti suspek iti insidente ken awan pay ti naited nga estimate iti gatad ti kuarta wenno ramit a naitaray dagitoy.
Inlawlawag ni Vergara a ti naholdap wenno naalaan iti alikamen ket ti mismo a cashier wenno agbanbantay iti gasolinaan.
