LAOAG CITY – Binilin ni Bureau of Corrections Director General Gregorio Pio Catapang Jr. dagiti amin a superintendent dagiti pagbaludan ken penal farm a mangisaganada ti contingency plan para iti manamnama nga epekto ti El Niño.
Segun iti nasao nga ahensia, masapol a masigurado ti agtultuloy a panangipaayda ti serbisio ken maprotehiran ti salun-at dagiti persons deprived of liberty (PDLs) ken dagiti empleado.
Mainaig iti daytoy, karaman iti masapol a masaganaan ket ti panagkurang ti mausar a danum, nakaro a pudot, makan, serbisio para iti medikal, kinadalus dagiti pagbaludan ken ti emergency response.
Malaksid iti daytoy, nabilin pay kadakuada ti panangdakamatda kadagiti nakabalud a nalaka a matamaan ti heat-related illnesses tapno maikkanda dagitoy ti insigida a tulong medikal.
Kabayatanna, masapol ti panangisubmitir dagiti superintendent ti El Niño contingency plan-da iti Office of the Director General agingga Nobiembre 2, kas paset ti napaiget a panagsagsagana ti ahensia iti nasao a pangta ti El Niño.
