Naarestar ti maysa a lalaki kalpasan a nagtakaw ti kalding iti paset ti Barangay 30-B, ditoy ciudad ti Laoag.
Basar iti Philippine National Police, nagreport ti akinbagi ti kalding nga agtawen ti 56 a lalaki, naasawaan ken residente metlaeng iti nadakamat a barangay kalpasan a saannan a makita ti taraken na nga inwarwar na laeng iti kataltalunan.
Iti imbestigasyon dagiti otoridad, nakita iti CCTV footage ti suspek a nangilugan ti kalding iti kurung-kurong na.
Dagus a nangisayangkat ti hot pursuit operation dagiti otoridad a nakatiliwan da iti suspek nga agtawen ti 37, naasawaan, negosyante, ken residente ti Brgy 57, Pila ditoy ciudad ti Laoag, ken naala da iti ikotna ti nasao a kalding.
Iti baet ti napasamak, nagdesisyon ti akinbagi iti kalding a saanen nga agpila pay ti reklamo kontra iti suspek gapu ta ti napateg ket naisubli kenkuana ti taraken na.
