LAOAG CITY – Naarestar ti maysa a babai iti naisayangkat nga entrapment operation ditoy siudad ti Laoag.
Ti suspek ket maysa a babai agtawen ti 25, awanan asawa, tubo ti Brgy. Teppeng, Sinait, Ilocos Sur, ken agdama nga agnanaed iti Brgy. 55-B, Salet Bulangon, ditoy siudad.
Basar ti Philippine National Police – Laoag, nagkamang 22-anyos a lalaki, awanan asawa, ken residente iti Barangay 54-B Camangaan ditoy siudad ken maysa a 22-anyos a babai, awanan asawa, ken residente iti Brgy. 55-C Vira, Laoag City, Ilocos Norte, a nagreport idi agarup alas 6:30 ti rabii idi Setiembre 30, 2026 ken nagkiddaw iti tulong ti pulisya mainaig iti mapapati a panangala ti suspek iti kuarta kadakuada babaen ti pangta ken pammutbuteng sipud pay idi 2024.
Basar ti imbestigasion a mapapati a kiniddaw ti suspek ti ₱13,000 manipud kadagiti biktima ken impangtana nga ipakaammona kadagiti nagannak ti biktima ken i-post-na iti maysa a social media plaform maipapan iti maipagarup nga abortion dagiti biktima iti anakda no saan a maited ti kiddaw a gatad.
Mainaig iti daytoy, bayat ti komunikasionda, binilin ti suspek dagiti biktima nga agtataripnongda iti sango ti Laoag City Public Market no sadinno nga inyawat ti biktima ti kidkiddawen a kuarta.
Gapu kadagiti mapapati a pangta ken pammutbuteng, inanamongan ti biktima ti kiddaw ti suspek ket kaduana ti maysa nga intelligence operative, nagturong iti napagnunumuan a lugar ti transaksion.
Nupay kasta, bayat ti panagturong dagiti biktima ken dagiti operatiba iti napagnunumuan a lugar ti transaksion, tinawagan ti suspek ti babai a biktima ket binilinna nga inayonna ti ₱8,000.00 iti dati a napagnunumuan a gatad, a nangiyeg iti dagup a gatad iti ₱21,000.00.
Nagtungpal ti biktima iti kiddaw ti suspek ket idi simmangpet iti lugar a nakaitransaksyon, inyawat dagiti biktima ti ₱21,000.00 a boodle money a naikabil iti puraw a sobre.
Apaman a malpas ti transaksion, dagus nga immasideg dagiti operatiba ket inarestoda ti suspek.
Ti suspek ket adda iti kustodiar ti Laoag City Police Station para iti umno a dokumentasion sakbay ti pannakaipila ti kaso kontra kenkuana iti korte
