LAOAG CITY – Inbasura iti Korte ti kaso nga illegal gambling konrra kadagiti lima nga indibidual a naarestar gapu iti panagsusugal iti ili ti Badoc.
Segun ken ni Police Lt. Jonathan Alonzo, Deputy Chief Alpha Police ti Philippine National Police iti nadakamat nga ili a daytoy ket gapu ti kinakurang ti ebidensia a naidatag iti korte pakairamanan dagiti kurang a papeles.
Gapu iti daytoy, insigida a naway-wayaan dagiti lima nga indibidual.
Nupay kasta, nagballag iti Philippine National Police iti ili ti Badoc nga saan a mangiwayat iti aniaman nga iligal a panagsusugal gapu ta naiget daytoy a maipawpawil.
Immunan iti daytoy, naarestar ti lima nga indibidual gapu iti panagsugal ken panagay-ayam ti “Lucky 9” iti maysa a minatayan iti Barangay Labut iti nasao nga ili.
Nabigbig dagiti naarestar a maysa a lalaki nga agtawen ti 64, naasawaan, maysa a mannalon ken residente iti metlaeng nasao a lugar; maysa a lalaki nga agtawen ti 40, naasawaan, maysa met a mannalon; maysa a lalaki nga agtawen ti 46 naasawaan, maysa chainsaw operator ken residente iti Barangay Gulpeng, Pinili, Ilocos Norte; maysa a lalaki nga agtawen ti 26, awanan asawa, maysa a delivery rider ken residente ti Barangay Canaan iti ili ti Badoc; ken maysa lalaki nga agtawen ti 27, awanan asawa, estiduante ken residente iti Barangay Labut, Badoc.
Mainaig iti daytoy, nakumpiskar manipud kadagiti naarestar ti P5,505 a nausar kas bet money, maysa a set ti playing cards wenno baraha, table cloth, monobloc table ken tugtugaw.
