LAOAG CITY – Kinumpirmaran ti National Privacy Commission (NPC) a nakaawat daytoy ti personal a data breach notifications manipud iti sangapulo nga ahensia ti gobierno.
Karaman kadagiti ahensia a nakapasar ti data breach ket ti Department of Information and Communications Technology (DICT), Department of Labor and Employment (DOLE) iti babaen ti Bureau of Local Employment-na, Bureau of Internal Revenue (BIR), ken ti Philippine Amusement and Gaming Corporation (PAGCOR).
Malaksid kadagitoy, naaddaan pay ti data breach ti Department of Justice (DOJ) iti babaen ti Office for Alternative Dispute Resolution-na, ti Securities and Exchange Commission (SEC), Department of Trade and Industry (DTI), Department of Science and Technology – Philippine Institute of Volcanology and Seismology (DOST-PHIVOLCS), Presidential Commission on Good Government (PCGG) ken ti Philippine Coast Guard (PCG).
Basar iti National Privacy Commission (NPC), manamnama ti panangiwayatna ti imbestigasion iti nasao a pannakatakaw dagiti personal a datos manipud kadagiti nadakamat nga ahensia.
Kuna ti ahensia a nupay pagrebbengan ti komision ti mangidaulo iti pannakaprotehir dagiti sensitibo a datos, adda latta obligasyon dagiti ahensia ti gobierno a siguradoen ti pannakaprotehir dagiti datosna tapno masigurado ti kinatalged ken maliklikan ti aniaman a klase ti pananggundaway.
Kabayatanna, binallaagan met ti komision ti publiko nga agtalinaed a naannad kontra kadagiti phising attempt, panangluko iti online, pannakatakaw ti identity ken dagiti dadduma pay a klase ti social engineering a mabalin a mangitunda ti pananggundaway manipud kadagiti naireport a data breaches.
