LAOAG CITY – Aktibo nga isaysayangkat ti Bureau of Fire Protection ditoy siudad ti Laoag ti daily tri-skills enhancement program no sadinno daytoy ket minalem nga adda ti maiwaywayat nga aktibidad para iti pananakaipapigsa dagiti kinasiribda para iti panagrespondeda iti aniaman a klase ti insidente.
daytoy ket paset pay laeng ti mandato kadakuada ti National Office ti nasao nga ahensia, no sadinno tunggal istasion iti intero a pagilian ket masapol a mangisayangkat iti kastoy a programa.
Inbatad ni Fire Senior Inspector Edison Reyes a dagiti sursurotenda nga aktibidad a minalem nga isaysayangkatda ket immuna a napagnonomoan iti National Office ti ahensia.
Kinunana a dagiti aktibidad nga iwaywayat ti ahensia ket pakairamanan dagiti fire fighting, emergency rescuing ken ti medical services kas iti first aid.
Inpettengna ti importansia dagitoy a banag tapno maiyulo kadagiti tunggal miembro ti Bureau of Fire Protection dagitoy a kinasirib tapnon dagitoy ket maiyaplikarda ken saanda a malipatan.
