Nauram ti dua a 2-storey a balay iti paset ti Barangay Madamba iti ili ti Dingras.
Segun ken ni Senior Fire Officer 3 Dawn Ryan Cabias, ti Fire Marshall iti Bureau of Protection iti ili ti Dingras, naireport kadakuada ti napasamak iti oras ti alaas-3:40 itay parbangon, ket dagus da met a nagresponde iti lugar.
Kuna na nga idi makadanon da iti lugar ket dakkelen ti uram no sadinno a ti maysa kadagitoy ket naminpinsan a nauram idinto a ti maysa a balay ket ti laeng babana ti nasalbar.
Inpakaammo ni Cabias a gapu iti kadakkel ti apoy apaman a nakadanun da iti lugar ket nagkiddaw da ti tulong iti Bureau of Fire Protection iti ili ti Marcos, Solsona ken San Nicolas, no sadinno a dagus met dagitoy a napan timmulong.
Inrakurak ni Cabias nga iti oras ti alas-5:22 itay parbangon ket naan-anayen a nasebseban da ti apoy.
Innayon na a ti pagsayaatan na ket awan ti nadangran kadagiti tallo nga agnanaed iti dua a balay kalpasan ti insidente.
Kabayatanna, kuna ni Cabias a saanda pay a masinunuo ti pakabuklan ti balor dagiti nadadael iti napasamak nga uram gapu ta manarimaan paylaeng ti isaysayangkat da nga imbestigasyon ken saan da pay a nakasarita a naimbag dagiti agtagikua iti dua a balay.
Inbatad na pay nga iti inisyal nga imbestigasyon da ket nangrugi ti apoy iti baba ti maysa kadagiti balay ngem saanda pay a maibaga no ania ti nangrugyan daytoy.
