LAOAG CITY – Nauram ti maysa a dump truck iti national highway iti nagbaetan ti Barangay 16 San Marcos ken iti Barangay 22 San Guillermo iti ili ti San Nicolas.
Segun ken ni Senior Fire Officer II Donald Isaguirre iti Bureau of Fire Protection iti ili ti San Nicolas, apaman a naawat da ti report mainaig iti insidente ket insigida a nagresponde dagiti tallo a firetruck da.
Inbatad ni Isaguirre a ti nauram a dump truck ket maar-aramat a pagbunag kadagiti construction materials, no sadinno nga idi napasamak ti uram ket manarimaan a ma-welwelding ti datar ti dump truck, ken patien da a ti sparks manipud iti pannaka-welding-na ti nagrugian ti apoy.
Mainaig iti daytoy, inbatad ti agwelwelding a kabayatan ti panag-welding-na ket adda ti nariknana a napudot iti likudan na, isut gapuna a bimmaba a dagus iti truck kalpasan a binusinaan daytoy dagiti motorista a nakakita ti pannakaur-uram ti driver seat ti dump truck.
Awan met ti nadangran iti nasao nga insidente.












