LAOAG CITY – Nagpalagip ni Fire Supt. Nemesio Valenciano Jr., ti acting Provincial Fire Marshal ti Ilocos Norte, iti publiko a masapol a tinawen a pa-checkup ti electrical system tapno maliklikan ti uram.
Kuna na a tunggal maysa ket responsibilidad na nga amwen ken aramiden dagiti addang tapno maliklikan ti uram.
Inbatad na a maysa kadagiti kangrunaan a pangrugyan ti uram ket ti electrical connection.
Inbalakad na a masapol nga ikkaten ti saksakan dagiti appliances no saan nga usaren, aglalo no pumanaw iti pagtaengan.
Innayon na nga adda pay dagiti wirings a kasapulan a mapasayaat gapu ta no mabaybay-an dagitoy ket mabalin a mangitunda ti uram.
Malaksid iti daytoy, siguradwen a naimbag a dagiti paglutwan ket maiddep ti apoy na sakbay a panawan.
Namonganay daytoy a rakurak ni Valenciano kalpasan nga adda ti nauram a dua a pasdek iti ili ti Pagudpud.
