LAOAG CITY – Manarimaanen ti panangdeterminar ti lokal a gobierno ti pondo a mausar iti pannakaisayangkat ti training dagiti adda iti pottery industry iti ili ti San Nicolas.

Segun ken ni Mayor Edmar Vincent Bonoan, malaksid kadagiti addan iti pottery industry ket mabalin pay a gundawayan dagiti kayatna ti makasursuro iti panagaramid iti nagduduma a produkto babaen ti panagdamili iti nasao nga ili.

Kuna pay ti mayor nga adda ti plano da a mangiyam-ammo ti panagdamili kadagiti agad-adal iti elementarya iti ili ti San Nicolas.

Inlawlawag ni Bonoan a gagem ti mausayangkat a panagsanay ket tapno masursurwan dagiti umili nga agaramid iti nalaglagda a produkto babaen ti panagdamili kas ti dalikan, banga ken dadduma pay.