LAOAG CITY – Mangipaay ti libre a serbisio ti panagbakuna ti anti-rabbies, panagkapon, ken spaying kadagiti taraken nga aso ken pusa iti City Veterinary Office iti siudad ti Batac.
Ti nasao a serbisio ket maipaay kadagiti residente iti nasao a siudad a maiyuswat intono Nobyembre 12 agingga 13, 2026 iti Imelda Cultural Center.
Mainaig iti daytoy, ti nasao nga inisiatiba ket pagbinnuligan ti City Veterinary office ken ti College of Veterinary Medicine iti Mariano Marcos State University (MMSU) – Batac Campus.
Daytoy ket kas paset ti panangitandudo iti siudad ti Animal Welfare ken responsable a panagtaraken kadagiti dingwen.
Maisayangkat intono Nobyembre 12 ti panagkapon ken spaying services a para laeng kadagiti pusa, idinto nga intono Nobyembre 13 ket para met kadagiti taraken nga aso.
Mangnamnama ti ahensia a babaen ti nasao a programa ket ad-adda a matulongan dagiti agtartaraken kontra iti agtultuloy a panagado ti populasyon dagiti dingwen.
