Addan ti sumuruk-kumurang a 800 a mannalon ti naapektaran ti El Niño iti ciudad ti Batac.
Daytoy ti inbatad ni Mr. Mark Allan Abad, ti mangidadaulo iti City Agriculture Office nasao a ciudad.
Segun ken ni Abad, napintas ti nagbalin nga apit dagiti mannalon nga immuna a nagapit ti mula da a pagay gapu ta nabuslon paylaeng idi ti danom a pinagpadanom da.
Inpakaammo na a dagiti mannalon a naapektaran ti tikag a miembro ti Philippine Crop Insurance Corporation ket nag-claim dan ti indemnity.
Mainaig iti daytoy, kuna ni Abad a naiyalokaran pay ti ciudad ti Batac ti 813 milyon a benepisyaryo ti Assistance to Individuals in Crisis Situations a programa ti Department of Social Welfare and Development no sadinno a dagiti nadidigraan a mannalon iti ciudad ti mapili.
Innayon na nga intono Nobyembre 10 ket mabunungan ton ti tulong pinansyal dagiti mannalon nga apektado ti tikag.
Malaksid iti daytoy, adda pay ti ibunong ti gobierno lokal iti ciudad ti Batac a 1,100 a water pumps ken irrigation hose no sadinno a ti target ket maipaayan amin dagiti mannalon tapno adda ti sigurado nga adda ti bukod a pagpadanom ti tunggal maysa.
Inrakurak na nga umabot iti 6400 amin dagiti mannalon iti ciudad ti Batac ken no maibunong ti 1,100 a water pumps iti sumaruno a lawas ket nasurok to laengen a 300 a mannalon ti saan a mabunungan.
Kabayatanna, inbatad ni Abad nga ibalbalakad da met kadagiti mannalon nga iti panawen ti tikag ket agmula da ti kadagiti saan unay nga agkasapulan ti nabuslon a danom kas ti balatong, balanghoy, otong ken dadduma pay.
