Inbatad ni Acting Branch Manager Shoreen Manglinong ti National Food Authority (NFA) a silulukat a kanayun ti opisina da para iti panaggatang ti irik dagiti mannalon ditoy probinsya.
Segun kenkuana, napigsa ti panaggatang ti irik ditoy probinsia aglalo ditoy ciudad ti Laoag ken iti ili ti Dingras, pakairamanan dagiti ili ti Santa ken Candon iti Ilocos Sur.
Inpakaammo na a napunno dagiti warehouse da idiay Abra gapu ta ado dagiti stock da nga irik.
Innayonna a ngumatngato met ti average daily procurement da, ken namnamaen da nga umado pay daytoy gapu ta ti target da a gatangen ket agarup 375,000 a sako ti irik.
Iti agdama, adda ti agarup 58,000 a sako ti irik ti nagatang dan idinto a target da ti gumatang ti 80,000 a sako ita a bolan.
Namnamaen da a ngumato pay ti bilang dagiti gatangen da nga irik iti sumaruno a bulan, gapu ta ado pay dagiti ili nga agapit a ti irik intono Nobyembre ken Disiembre.
Kabayatanna, inlawlawagna a mabalbaliwan ti buying price ti irik kada lawas no sadinno nga ita a lawas ket P30 ti kada kilo ti irik ditoy Ilocos Norte ken Ilocos Sur, idinto a P29 met ti kada kilo idiay Abra.
Innayo na a dagiti irik a gatangen ti NFA ket masapul a nadalus ken namaga.
