LAOAG CITY – Inrakurak ni Ms. Shey Pia Abaya, mangidadaulo ti Public Emloyment Service Office ditoy siudad ti Laoag nga adda ti 11 a government agencies a makipaset ti Job Fair a maiyuswat kagiddan iti panangselebrar ti Labor Day iti SM ditoy siudad ti Laoag.
Inbatadna a dakkel a tulong ti presensia dagiti government agencies gapu ta no adda ti kalikagum dagiti umili a saludsoden ket masungbatanda dagitoy.
Inlawlawagna a dagiti makibinnulig iti job fair a government agencies ket Overseas Workers Welfare Adminstration, Department of Migrant Workers, Professional Regulation Commission, Civil Service Commission ken dadduma pay.
Kunana a maisayangkat daytoy inton Mayo 1 iti SM City Laoag iti oras ti 9:00 ti bigat agingga 4:30 ti malem.
Innayonna nga al-alukoyenna dagiti umili a makipaset iti job fair gapu ta adda ti 23 a local companies a naimbitaran ti Public Emloyment Service Office a mangidiaya kadagiti nagduduma a panggedan.
