LAOAG CITY – Inbatad ni Mr. Boyet Concepcion, meat vendor iti Barangay 50, Buttong ditoy ciudad ti Laoag nga awan ti problema kenkuana ti nailungalong a gakat iti Sang Panlalawigan a masapol a uniform wenno agpapada ti presyo ti karne ti baboy ditoy probinsya.
Inlawlawag na nga adda ti pagsayaatan na ti nasao nga addang tapno saanen a pagkokomparaen dagiti aggatang ti presyo ti karne.
Kuna na nga adda dagiti tattao nga agkwestyunar no apay nga adda dagiti nangingina ti panaglako na ti karne ti baboy idinto a dagiti dadduma ket nalaklaka.
Nupay kasta, kuna ni Concepcion a dagiti nalaklaka ti panaglako na ti karne ti baboy ket isu dagiti nalaklaka met laeng ti panaggatang da kadagiti live weights.
Innayon na a no 150-160 ti bracket ti live weight ket makuntenton iti 260 a pisos a presyo ti baboy iti kada kilo.
Kabayatanna, pabor met ni Mr. Oscar Diza iti ili ti Vintar iti inlungalong a gakat ni Bokal Domingo Ambrocio, chairman ti COmmittee on Agriculture ditoy probinsya.
Daytoy ket mainaig iti pannakaipatungpal ti uniform wenno agpapada a presyo ti karne ti baboy, agdepende no ania ti mapagnunumoan ti maysa nga ili.
Inbaga na a kas maysa nga hog raiser ket napintas unay ti nasao a gakat tapno maproteksyunan dagiti producers kasta met dagiti consumers.
Saan met pay a maibaga ni Diza no mano ti kayat na a presyo ti karne ti baboy iti kada kilo gapu ta masapol a mapagsasaritaan a naimbag daytoy a banag.
