Agsagsaganan ti City Health Office (CHO) ditoy ciudad ti Laoag kadagiti possible nga epekto ti El Niño para iti salun-at.
Segun kenni Dr. Rodrigo Catcatan, mangidadaulo ti City Health Office, nakitaripnongda kada Mayor James Bryan Alcid iti napalabas a lawas tapno pagsasaritaan da dagiti addang tapno maliklikan wenno maalay-ayan ti possible a a nakaro a risgo iti salun-at ti nakaro a kinabara ti panawen.
Kunana a maysa kadagiti kangrunaan a pakaseknan da ket ti pannakaisagana dagiti agas ken dadduma pay a kasapulan a medisina tapno dagus a matulongan dagiti residente a mabalin a maapektaran iti napudot a paniempo.
Kabayatanna, inpasigurado ti City Health Office nga adda umdas nga agas a kasapulan, nangruna kadagiti kaso ti heat stroke, dehydration, high blood pressure ken diabetes.
Inpakaammo na a nakasagana met dagiti oral rehydration solution a mabalin a maited kadagiti tattao a maapektaran ti dehydration gapu iti kinapudot ti panawen.
Kabayatanna, nagpalagip ni Dr. Catcatan kadagiti residente nga ugalien ti uminom iti ado a danum ken liklikan iti nabayag a pannakabilag iti kapudotan, nangruna kadagiti ubbing, nataengan, ken dagiti addaan iti sakit.
