LAOAG CITY – Ad-adda pay a paigetan ti Department of Education (DepEd) ken Department of the Interior and Local Government (DILG) ti seguridad dagiti pagadalan babaen ti panangi-deploy da kadagiti barangay tanod ken ti panangipakaammo ti 911 emergency system kadagiti pagadalan.
Karaman iti joint memorandum circular a pinirmaan dagiti dua nga ahensia idi Oktubre 14 iti panangidaulo da Education Secretary Sonny Angara ken ni Interior Secretary Jonvic Remulla, kagiddan ti pannakaisayangkat ti school safety audit ken emergency drill iti Bangkal High School iti Makati City.
Iti salinong ti nasao a katulagan, mabalinen a makibinnulig dagiti pagadalan kadagiti maseknan a barangay tapno agkiddaw ti tulong kadagiti barangay tanod tapno mapagtalinaed ti kinatalged iti uneg ti ken aglawlaw dagiti pagadalan.
Sakbay a mai-deploy dagiti barangay tanod kadagiti pagadalan, umuna a dumalan dagitoy iti orientasion tapno masigurado a masurot dagiti pagalagadan iti panangpatalinaed ti linak ken talna kadagiti pagadalan.
Malaksid iti pannakai-deploy dagiti barangay tanod, ipatungpal pay ti Department of Education ti unified 911 emergency system ti Department of the Interior and Local Government (DILG) babaen ti technology firm ti National Government Agency ti pagilian.
Mainaig iti daytoy, aggiddan a maawat ti Philippine National Police (PNP) ken ti Department of Education dagiti report maipanggep kadagiti nagduduma nga emerhensia tapno mapaalisto ti panagresponde ken koordinasion dagiti dua nga ahensia.
Kabayatanna, paset ti nasao nga addang a papigsaen ti koordinasion ken para iti naig-iget a seguridad kontra kadagiti insidente ti kinaranggas, pammaltog ken dagiti dadduma pay a pangta iti kinatalged dagiti estudiante ken mangisursuro iti uneg ti pagadalan.
