LAOAG CITY – Impetteng ni Education Secretary Sonny Angara a nakaibasar iti performance ken kontribusion iti publiko ti promosion dagiti opisial ken empleado ti Department of Education (DepEd), imbes nga iti koneksion iti politika.
Daytoy ket kalpasan ti panagbitlana iti kaunnaan a Literacy and Numeracy Expo cum Training of Trainers on the Institutionalization of Technical Assistance on Instructional Delivery a naiwayat idiay Iloilo City.
Segun kenkuana, napateg nga amoen ken ipaayan ti oportunidad dagiti personnel a mangipakpakita ti kinalaing ken umno a serbisio publiko iti ahensia.
Impanagetgetna nga iti panagserbi iti publiko ti kaunaan a pagibasaran iti panangammo ken panangipaay ti posision iti tunggal miembro.
Innayonna pay nga awan iti lugar ti DepEd ti panagusar ti ‘backer’ wenno pampolitiko a koneksion tapno makagun-od ti promosion.
