LAOAG CITY – Pinirmaanen ni Presidente Ferdinand Marcos Jr., ti Executive Order No. 130 maipanggep iti baro a pagalagadan iti suspension ken panagsubli ti klase dagiti estudiante iti panawen ti didigra.
Iti salinong ti nasao a pammilin, saan laengen a dagiti lokal a gobierno ti adda pannakabalinna nga agdesision iti suspension ti klase, no sadinno addaan payen ti pammalubos dagiti pagadalan a mangkanselar ti klase no adda ti makitada nga aniaman a pangta iti seguridad dagiti estudiante ken mangisursuro.
Mainaig iti daytoy, kalpasan ti pannakaiparuk-at iti nasao a pammilin ket addan ti tallo a pagadalan a nangsuspenso ti klase iti salinong ti nasao nga Executive Order.
Kabayatanna, naipasigurado iti nasao a pammilin ti saan a panagsardeng ti panagadal dagiti estudiante no nasuspenso ti face-to-face classes gaputa masapol latta dagitoy nga agaramat ti sabali a wagas kas ti panagusar ti online.
