Inpaganetget ni Education Secretary Sonny Angara ti agtultuloy a panangilungalong ti Filipino a lenggwahe, pakairamanan pay dagiti lokal ken rehional a lenggwahe wenno dialekto iti pagilian.
Daytoy ket kageddan iti panagselebrar ti maika-90 nga anibersario ti Komisyon sa Wikang Filipino (KWF).
Segun ken ni Angara, paset dagiti addang ti Department of Education ti panangpaadu dagiti libro a mai-translate iti nagduduma a lenggwahe tapno ad-adu a Pilipino ti maaddaan ti gundaway a makabasa ken makasursuro usar ti lenggwahe a maawatanda.
Maisaysayangkat dagitoy iti babaen ti programa ti gobierno iti panangipablaak ti libro, kabinnulig ti National Book Development Board ken dadduma pay nga ahensia a babaen iti Department of Education.
Malaksid iti daytoy, gagem pay ti nadakamat a programa a magutigot ti ad-adu pay a Pilipino kangrunaan dagiti agtutubo nga maadaan ti interes iti panagbasa kabayatan nga ipatpateg ti bukod a lenggwahe ken kultura.
Kabayatanna, inpetteng pay ti sekretario a saan laeng a Filipino ti masapul nga ilungalong no di ket dagiti pay lokal ken rehional a lenggwahe a napateg a paset iti identidad ti tunggal komunidad.
