Inrakurak ti Office of the Vice President (OVP) nga agbiyahe ni Bise Presidente Sara Duterte nga agturong iti Hong Kong manipod ita nga aldaw Nobyembre 6 agingga intono Nobyembre 8, 2026 tapno agatendar ti nagduduma nga aktibidad ken programa.
Karaman kadagiti kangrunaan nga atendaran ti Bise Presidente ket ti maysa a panagtitipon nga inorganisar ti Filipino Community (FilCom) iti Hongkong.
Kinumpirmaran ti Office of the Vice President nga adda ti iggem a permit ni Duterte manipod iti Quezon City Regional Trial Court Branch 98 a naiparuk-at idi Nobyembre 3, 2026 para iti ipapanaw na iti pagilian.
Malaksid iti paammalubos ti korte, pormal met a nangiparuk-at ti travel authority ti Office of the President para iti panagbiyahe na.
Inlawlawag ti opisina ti bise presidente a bukod a kwarta ken personal a pondo ni Duterte ti usaren na tapno ibaklay dagiti magastos iti panagbiyahe na.
Inpetteng manen ti Office of the Vice President nga awan ti aniaman a pondo, sanikua wenno pasilidad ti gobierno a mausar mainaig iti panagbiyahe ni Duterte iti Hong Kong.
