LAOAG CITY – Bimmisita ti Raniag Creative Tour ti Deparment of Tourism ditoy siudad ti Laoag.
Kaduada ti pannakabagi ti Department of Trade and Industry, Travel Agencies, Media, Social Media Influencers, Vloggers ken nagduduma pay a grupo.
Nagsursor dagitoy kadagiti nagduduma a Local Government Units (LGUs) no sadinno a naitampok dagiti nagduduma a produkto nga ipanpannakkel da.
Mainaig iti daytoy, ti kangrunaan a gagem da ket ti mangkita ken mangdiskobre kadagiti potensial pay nga adda iti maysa a lugar kas koma ti pagpasiaran, taraon, produkto ken kababalin a makuna a naidumduma kadagiti sabali a lugar.
Segun ken ni Sangguniang Panlungsod Bjorn Lao, nagturong dagiti nasao grupo iti Barangay Cataban ditoy siudad.
Naimataganda dagiti native delicacies nga aramid dagiti residente ditoy siudad kas ti inkalti ti Barangay Bacsil South ken ti lubi-lubi ti Barangay Talingaan.
Naimatangan da pay ti panagkanta ken daniw ti Talugading ni Ilokano Cultural Troupe.
Naitampok pay dagiti produkto a naaramid manipud iti waterlilies a pinartuat ti Cataban Weavers Association a maysa kadagiti pagsapulanda.
Naragsakan dagiti bisita gapu ta napadasan da pay ti nagaramid kadagiti naisangsangayan a produkto.
Kabayatanna, karaman a naimatangan ti grupo ket dagiti intantandudo ti gobierno siudad partikular ti City Tourism Office ken City Social Welfare and Development Office.
