Nadutokan kas opisial a Chief Minister ti Bangsamoro Autonomous Region in Muslim Mindanao (BARMM) ni Abdulraof “Sammy Gambar” Macacua kalpasan a nakagun-od daytoy ti 51 a botos iti naisayangkat nga eleksion iti parliament ita nga aldaw ti Biernes, Oktubre 30, 2026.
Daytoy a naisangsangayan nga eleksion ket nangleppas iti pito a tawen a transition governance a nagmarka iti pormal a panagakar manipud ti naikeddeng nga interim authority, ti Bangsamoro Transition Authorithy (BTA), nga agturong iti maysa a regular ken demokratiko a panagbotos ti rehional a gobierno, maiyataday iti Bangsamoro Organic Law (BOL) wenno Republic Act No. 11054.
Ti Bangsamoro Organic Law ket naapruparan idi 2019 a nangipasdek iti Bangsamoro Autonomous Region in Muslim Mindanao (BARMM) kas resulta dagiti dekada ti negosasion para iti kappia iti baet ti gobierno ti Pilipinas ken ti Moro Islamic Liberation Front (MILF), a gagemna ti mangipaay ti ad-adda a napalawa a kabukbukodan a panagturay ken bukod a panagdesision kadagiti umili a Bangsamoro.
Inabak ni Macacua manipud iti Bangsamoro Federalist Party (BFP) ni dati nga interim chief minister Ahod “Al Haj Murad” Ebrahim a nakagun-od laeng ti 27 a botos manipud iti 80-member Bangsamoro Parliament.
Ni Macacua, maysa a napateg a pigura iti proseso pangkappia, ket dati a chief of staff ti Bangsamoro Islamic Armed Forces (BIAF) ti Moro Islamic Liberation Front (MILF) ken mangibagbagi iti 3rd parliamentary district ti Maguindanao del Norte, nagserbi pay daytoy kas interim chief minister ken acting provincial governor.
