Inbatad ni SAO IV Bismarck Bengwayan, Acting Public Information Officer ti Philippine Drug Enforcement Agency PDEA Region 1 a malaksid iti panagtiliw da kadagiti indibidual a maipagarop nga addaan ti illegal, ti maysa pay a tututukan da ket ti rehabilitasyon.
Kuna na a katulungan da ditoy dagiti Local Government Units ken ti Department of Justice.
Inlawlawag na a ti programa da a rehabilitasyon a pakairaman ditoy ti community-based rehabilitation, in-house rehabilitation, ken bahay-silangan reformation center no sadinno a ti tututukan da ket ti kangrunaan na a tututukan da ket dagiti karaman iti illegal a droga.
Inpalagip ni Bengwayan ti panangyarig ni Presidente Ferdinand Marcos Jr. ti droga kas sakit a rumbeng a mataming ken matutukan.
Innayon na a malaksid kadagiti isaysayangkat da a reformation wenno rehabilitation, agtultuloy ti kampanya ken adbokasiya ti ahensya babaen ti panangipatungpal da ti lectures kadagiti barangay, a pakairamanan ditoy ti community drug watch ken coastal drug watch.
Inrakurak ni Bengwayan a babaen kadagitoy a lectures ket masursurwan dagiti umili no ania ti rumbeng nga aramiden da no makakita da kadagiti mapagduduwaan a banag, siasinno ti pagreportan da, ken no kasanu da daytoy a mausar kas ebidensya.
