Nagballigi ti naisayangkat nga anti-illegal drug operation iti ili ti Sarrat a nakaarestaran ti maysa a lalaki, agtawen ti 33, awanan ti asawa, ken residente iti ili ti San Nicolas.
Daytoy ti inbatad ni Police Capt. Ashley Cacayorin, ti chief of police iti ili ti Sarrat.
Kuna na a kadwa da a nangisayangkat ti operasyon ket ti Provincial Drug Enforcement, Regional Drug Enforcement Unit, ken ti Philippine Drug Enforcement Agency.
Inlawlawag na a kinemmeg da a dagus ti suspek kalpasan a naglako ti maipagarop a shabu iti nagpammarang a police poseur buyer no sadinno nga agdagsen amin ti 2.15 grams ti nakumpiskar da a maipagarop a shabu ken mapatta-patta nga agbalor dagitoy ti P14,620.00.
Malaksid iti daytoy, nakumpiskar da pay iti ikot ti suspek ti P1,000.00 a buy-bust money; dua nga sling bag, maysa nga small transparent box; maysa a cellphone, dua a lighter, maysa nga stick glue, maysa a pedaso ti crampled aluminum foil; maysa a piece glass pipe tooter nga addaan ti residue; dua nga small cut plastic straw; ken ti maysa a motorsiklo a silver-and-black Honda Click.
Inrakurak ni Cacayorin a nabayag da a minonitor ti nasao a suspek sakbay nga insayangkatan da ti operasyon.
Innayon na a nalawa ti masakupan ti operasyon ti suspek gapu ta adda pay dagiti koneksyon na iti nagduduma nga ili ditoy probinsya.
Iti agdama, nagtalinaed ti suspek a maibilang kas Street Level Individual iti Philippine National Police iti ili ti Sarrat kabayatan a maisagsagana ti reklamo a maipila kontra kenkuana.
