LAOAG CITY – Nangisayangkat ti Philippine Drug Enforcement Agency (PDEA) Region 1 ti Community-Based Anti-Illegal Drug Advocacy (CBAIDA) ditoy siudad ti Laoag kas paset ti pannakapapigsa iti kampanya kontra iti iligal a droga ken panangituloy iti proseso tapno maideklarar a drug-cleared city ti Siudad.
Segun ken ni SAO IV Bismarck Bengwayan, Acting Public Information Officer ti Philippine Drug Enforcement Agency PDEA Region 1, ti Community-Based Anti-Illegal Drug Advocacy ket maysa kadagiti kasapulan a programa a masapul a maipatungpal sakbay a maideklarar a drug-cleared ti maysa a siudad wenno munisipalidad.
Kalpasan ti pannakaisayangkat ti programa, masapul pay a mangisubmitir ti lokal a gobierno kadagiti dokumento ken dadduma pay a kasapulan para iti panangtingiting ken panangpatalged ti pannakaisayangkat dagiti anti-illegal drug programs.
Kunana nga iti agdama, pito laengen a munisipalidad ditoy Ilocos Norte ti manarimaan a maiprosproseso tapno maideklarar a drug-cleared, nga isu met ti mangipaay iti gundaway a maideklarar a drug-cleared ti sibubukel a probinsia.
Nupay kasta, inpaganetget ni Mr. Bengwayan a saan laeng a panangipatungpal iti Community-Based Anti-Illegal Drug Advocacy ti kasapulan, no di ket masapul met a mapagtalinaed ti operasion dagiti dadduma pay a programa a manglaban iti iligal a droga.
Namnamaen ti Philippine Drug Enforcement Agency a maituloy ti proseso ti drug-clearing iti Laoag City, agraman ti pannakaisayangkat ti regional oversight committee validation ken clearing intono Nobiembre ita a tawen.
Kabayatanna, no malpas ti proseso ken maipatungpal dagiti amin a kasapulan a dokumento, mabalinen a maideklarar ti Laoag City kas drug-cleared city.
