Inpakaammo ni Ms. Amelia Galvez, ti Director ti Department of Trade and Industry (DTI) ditoy probinsya a maisayngkat ti Partuat ti Kailokuan Trade Fair idiay Manila intono Nobyembre 26 agingga ti 29.
Segun kenkuana, ti trade fair ket kanayun a maisaysayangkat ditoy, ngem ita a tawen ket nagdesisyon da nga isayangkat daytoy iti Manila tapno maiya-ammo dagiti produkto ti probinsia iti sabali a lugar.
Inlawlawagna iti nasao nga addang ket maipaayan iti gundaway dagiti small and medium enterprises (SMEs) a mailako dagiti bukod da a produkto iti dakdakkel a kantidad.
Kalikagom pay ti ahensya a maipalawa dagitoy a negosyo kadagiti institutional buyers, kas kadagiti pasalubong centers, groceries ken department stores, tapno maikkan ti gundaway dagiti lokal nga entrepreneur nga agbalin a regular a supplier kadagitoy a negosio.
Innayon ni Galvez a napateg daytoy nga addang tapno agtultuloy ken mapagtalinaed dagiti negosyo dagiti lokal nga entrepreneur.
