Agtinnulong ti Department of Trade and Industry (DTI) ken ti Siudad ti Laoag iti panangpadur-as kadagiti lokal a produkto, nangruna iti bamboo craft ken dadduma pay nga handicraft a maaramid manipud kadagiti lokal a materyales.
Segun kenni Ms. Maricor S. Racela, Senior Trade and Industry Development Specialist ken Unit Head ti Market Development and Business Environment Unit, aktibo ti panagtinnulong da iti lokal a gobierno babaen iti City Social Welfare and Development Office, a mangsuporta kadagiti grupo dagiti agar-aramid iti produkto iti siudad.
Maysa kadagiti kangrunaan a programa ti pannakasukog ti bamboo craft, a gagem na ti mangpasayaat iti kalidad dagiti produkto ken mapaalisto iti proseso ti panagaramid babaen iti pannakausar dagiti makinarya iti Shared Service Facility.
Karaman met iti pannakasukog dagiti handicraft a maaramid manipud iti water hyacinth, a mangipaay iti gundaway kadagiti lokal a grupo a mangpasayaat iti kababalin ken komersial dagiti produkto.
Kabayatanna, namnamaen ti DTI a ma-qualify dagiti dua a grupo tapno maikkan ti gundaway a makipaset iti maika-30 a National Trade Fair nga aramiden iti SM Megamall, Manila, manipud Nobyembre 26 agingga Nobyembre 29, 2026.
Babaen iti panagtinnnulong ti DTI ken ti Siudad ti Laoag, namnamaen a mapalawa pay ti merkado dagiti lokal a produkto ken maipaayan ti ad-ado nga oportunidad dagiti agar-aramid iti handicraft ditoy siudad.
